Michel D’Amboise, “Quand les beaultez je voy des corps coelestes”, 1542
Quand les beaultez je voy des corps cœlestes
Et que je pense à toutes les terrestes,
J’en trouve tant, que j’en suis esbahy :
Lune, soleil, estoilles manifestes,
Planettes beaulx, nommez en mille textes
Et le surplus dont le ciel est garny ;
Du demourant, le nombre est infiny
Et ne pourroit jamais plume l’escripre.
Mais qui vouldroit en peu de motz les dire,
Ta grand beaulté, il mettroit en effaict,
Que je maintiens, qui qu’en vueille mesdire,
Des grans beaultez, le chef d’œuvre parfait.
Source : Le Secret d’amours, 1542.
OpenEdition vous propose de citer ce billet de la manière suivante :
Amandine Saison (25 février 2021). Michel D’Amboise, “Quand les beaultez je voy des corps coelestes”, 1542. Fleur des Tanneurs. Consulté le 7 décembre 2024 à l’adresse https://doi.org/10.58079/oph5
